Pangulong Ferdinand R. Marcos Jr. pinangunahan ang paglulunsad ng 2025 SSS Pension Reform Program

QUEZON CITY — Pinangunahan kahapon ni Pangulong Ferdinand R. Marcos Jr. ang seremonyal na paglulunsad ng 2025 Social Security System (SSS) Pension Reform Program kasabay ng deklarasyon ng National Pensioners’ Week, na itatampok tuwing ikalawang linggo ng Setyembre.

Photo Courtesy: Presidential Communications Office

Ginawa ang programa sa SSS Main Office sa East Avenue, Quezon City, kasabay ng pagdiriwang ng ika-68 anibersaryo ng SSS. Dumalo rin sa aktibidad ang mga opisyal at kawani ng SSS, miyembro ng Social Security Commission, at humigit-kumulang 50 pensioners na kumakatawan sa 3.8 milyong benepisyaryo sa buong bansa.

Photo Courtesy: Presidential Communications Office

Ayon sa SSS, ang Pension Reform Program ang kauna-unahang multi-year na umento sa pensyon sa kasaysayan ng institusyon. Sa ilalim ng programa, makatatanggap ng taunang dagdag ang lahat ng pensioners tuwing Setyembre mula 2025 hanggang 2027.

Nilalayon ng reporma na mapabuti ang benepisyo ng mga retirado, survivors, at dependents, habang unti-unting ipatutupad ang dagdag pensyon sa loob ng tatlong taon.