Patok ngayon sa social media ang “Okay na ‘to” parody ng ilang netizens tampok ang sablay na luto, hindi pantay na haircut, o mga diskarte sa buhay na medyo sabit pero pinanindigan na lang.
Ang trending phrase ay hinugot mula sa viral cooking videos ng social media content creator na si Grace Tanfelix, o mas kilala bilang “Mommy Grace.”
Sa kanyang mga vlog, mapapanood ang simple at walang ka-arte arte na pagluluto ng nakakatakam na mga putahe kung saan matatapos sa kanyang iconic line na “Okay na ‘to”, na ngayo’y ginagaya at tinatangkilik na ng marami.
Pero higit sa katatawanan, may aral sa likod ng sikat na linyang “Okay na ‘to”.
Sa mundong puno ng mataas na expectations–mula sa trabaho, relasyon hanggang sa goals sa buhay–hindi palaging masama na maging kontento.
Minsan, ang pagiging ‘okay’ sa buhay ay nagbibigay ng peace of mind. Dahil sa totoo lang, hindi lahat ng bagay kailangan maging perpekto para maging sapat.
Sa Christmas special episode ng Adulting with Joyce Pring podcast ng TV personality-host na si Joyce Pring, ibinahagi niya ang natutunan na dalawang foundational questions mula sa kanyang Christian life para maabot ang simpleng buhay.
Binigyang-diin ni Pring na sa buhay, hindi kailangan habulin palagi ang “next big thing,” dahil may kasiyahan na sa pagtanggap at pagpapahalaga sa kung ano lang ang mayroon ka sa kasalukuyan.
Isa pang mahalagang bahagi para malayang matanggap ang ibinabato sa’yo ng buhay ay ang katotohanan na hindi lahat ng bagay ay kaya mong kontrolin.
Ito naman ang itinuturo ng self-love and mental health advocate na si Jeng Taugan.
Sa isang viral video, ibinahagi ni Jeng, o mas kilala sa tawag na Mama Jeng, ang kanyang personal na journey tungo sa pag-enjoy ng buhay. Hindi raw kailangang maging perpekto ang lahat ng bagay sa paligid mo para maramdaman mong masaya ka—minsan, sapat na ang ‘okay lang.’
Sa huli, dapat may balanse sa pagitan ng appreciation at ambition. Kinakailangan matutunan ang diwa ng acceptance para naman sa bawat blessing ng umaga, ikaw ‘yung tipong mapapasabi ng “Okay na ‘to” nang maluwag sa puso kaysa sa nagdadalawang-isip kung “Okay na ba ‘to?”
– VC
