Naniniwala ang Presidential Anti-Organized Crime Commission (PAOCC) na malaki ang posibilidad na magtutungo si dismissed Bamban Mayor Alice Guo sa mga bansang kabilang sa Golden Triangle.
Ang Golden Triangle ay isang rehiyon sa mainland Southeast Asia na kinabibilangan ng Laos, Thailand, Myanmar at Cambodia.
Ayon kay PAOCC spokesperson Winston Casio, kilala ang pamilya ni Guo bilang offshore gaming operators sa bansang Cambodia kung kaya’t hindi malabong dito ang maging opsyon ng sinibak na alkalde.
“We’re confident that she’s trying to get into the Golden Triangle because the family, the Guo Family has business interest, gambling interests in Cambodia. So, that would be the safest bet that we have as of this moment,” saad ni Casio.
Bagaman napatunayang isang Chinese citizen, binigyang-diin ni Casio na malabong bumalik ng China si Guo lalo na’t nasasangkot ito sa illegal na Philippine Offshore Gaming Operators (POGO) at masyadong mahigpit ang China pagdating sa ‘gambling’.
Dagdag pa ni Casio, maliit din ang tyansang nagtatago sa European at South American countries si Guo dahil mabilis itong mahuhuli ng mga awtoridad.
“If I am a criminal from the Philippines, I will not go to countries where extradition between that territory and the Philippines exists and I will not go to territories that are party to the international… to the United Nations… UNTOC so to speak, United Nations Convention on Transnational Crime,” paliwanag ng opisyal.
Nitong Agosto 21, nahuli na ng Indonesian authorities ang kapatid ni Alice Guo na si Sheila Guo at umano’y business partner nitong si Cassandran Li Ong habang palabas ng naturang bansa.
Sa ngayon ay nasa kustodiya pa rin ng National Bureau of Investigation (NBI) ang dalawang indibidwal habang gumugulong ang imbestigasyon sa kanilang kinakaharap na mga kaso.
Samantala, kinukumpirma na ng PAOCC ang natanggap na impormasyong nagtangka umanong lumabas ng Indonesia at magtungo ng Hongkong si Wesley Guo.
Patuloy pa rin ang ginagawang paghahanap kay Alice Guo at ibang kapamilya nito. -VC
