Lumakas pa bilang isang Super Typhoon ang bagyong Ofel habang sumasailalim sa ‘rapid intensification’ batay sa 8:00 a.m. weather bulletin ng Philippine Atmospheric, Geophysical and Astronomical Services Administration (PAGASA) ngayong Huwebes, Nobyembre 14.
Huling namataan ang sentro ng bagyo sa layong 165 km East Northeast ng Echague, Isabela o 165 km East Southeast ng Tuguegarao City, Cagayan taglay ang lakas ng hangin malapit sa gitna na 185 km/h at pagbugsong umaabot hanggang 230 km/h.
Itinaas na ng PAGASA ang Tropical Cyclone Wind Signal (TCWS) No. 5 sa ilang bahagi ng Mainland Cagayan habang nakasailalim naman sa Signal No. 4, 3, 2, 1 ang malaking lugar sa Luzon.
Patuloy na kikilos ang bagyo sa direksyong northwestward sa Philippine Sea bago mag-landfall sa eastern coast ng Cagayan o northern Isabela mamayang hapon.
Pagsapit naman ng gabi, dadaan ang Super Typhoon Ofel sa Babuyan Channel kung saan magaganap ang posibleng panibagong landfall o paglapit nito sa Babuyan Island.
Samantala, binabantayan din ng weather bureau ang Tropical Storm Man-Yi sa labas ng Philippine Area of Responsibility (PAR) na huling namataan sa layong 1,525 km silangan ng Eastern Visayas bandang 2:00 ng umaga.
Inaasahang papasok ang TS Man-Yi sa PAR ngayong araw at tatawaging bagyong Pepito.
Hinihikayat naman ng PAGASA ang publiko na maging alerto sa lagay ng panahon. – AL
