Hindi inakala ng school canteen staff na si Alma Valenzuela na ang pinapangarap lang noon na kasal, matutupad pala sa paaralan kung saan siya mismo nagtratrabaho, ang National Teachers College sa Maynila.
Ang makasaysayang pag-iisang dibdib nina Alma at asawang si Mr. Rodrigo Eluzon, ginanap sa lush garden ng NTC Mendiola Building. Ito ang kauna-unahang garden wedding sa loob ng school institution.
Kwento ni Alma sa IBC Digital, naisakatuparan ang kanilang dream wedding sa tulong ng mga mag-aaral sa kursong BS Hospitality Management.
Bilang bahagi ng academic project, inorganisa ng mga estudyante ang lahat — mula sa wedding set-up, event styling, sound system, event hosting, photo at video coverage, pagkain, hanggang sa reception program at iba pang detalyeng karaniwang kinukomisyon sa mga professional events team.
“Sabi ko nung una, wow parang first time kong narinig na magkakaroon ng kasal sa school, so sabi ko baka simple lang. Pero nung time na nakita ko na kung paano sila mag-prepare, isa lang po talaga nasagot ko e, sabi ko lang talaga sa sarili ko…wow,” hindi makapaniwalang kwento ni Alma.
Para sa mag-asawa, higit pa sa inaasahan nila ang naging resulta.
“Sobrang thankful po talaga sa mga estudyante, alam po nila na sobrang proud ako sa kanila kasi ginawa po nilang possible yung gusto naming wedding,” dagdag niya.
Lubos din ang pasasalamat ng mag-asawa sa mga guro at opisyal ng NTC na sumuporta at kumikila sa katulad niyang empleyado.
Hindi lang ito naging isang school project kundi isang kwento ng malasakit, bayanihan, at tunay na diwa ng NTC community na nagpapatunay na sa likod ng bawat tagumpay, may mga taong marunong tumanaw ng utang na loob — at mga estudyanteng may pusong handang maglingkod hindi lang sa papel, kundi sa tunay na buhay. (VC)
