Iniulat ng Department of Tourism (DOT) na umabot na sa higit USD 1.1 billion o katumbas ng P65.3 bilyon ang kinita ng Pilipinas mula sa iba’t ibang aktibidad, produkto at serbisyong may kaugnayan sa turismo para sa buwan ng Enero ngayong taon.
Nalampasan nito ang P43 bilyong kinita ng bansa sa pre-pandemic level noong 2019.
Binigyang-diin ni DOT Secretary Christina Garcia-Frasco na ang pagtaas ng kita para sa turismo ay isang senyales ng lumalago at umuunlad na industriya na makatutulong sa pagtatag ng ekonomiya ng bansa.
“The recovery of Philippine tourism from the period of the pandemic in terms of revenues translates to thousands of jobs created for Filipinos, providing livelihood opportunities for many, especially in our rural and underserved areas,” ani Frasco.
Ayon pa sa kalihim, ang tagumpay na ito ay nakasunod sa layunin ng administrasyon ni Pangulong Ferdinand R. Marcos Jr. na gawing “inclusive and equitable” ang turismo para sa mga lokal na negosyante at komunidad.
Nangako naman si Frasco na titiyakin ng ahensya ang katatagan ng industriya ng turismo upang mas maraming turista pa ang magmamahal sa Pilipinas.
“As we move forward, our commitment to advancing Philippine tourism remains steadfast. We will continue to work hand-in-hand with industry stakeholders to innovate and promote the many reasons to Love the Philippines,” dagdag niya – VC
