Sa kauna-unahang pagkakataon ay bobolahin ngayong araw ng Pasko, Disyembre 25 ang iba’t ibang lotto draw ng Philippine Charity Sweepstakes Office (PCSO).
Mayroong maswerteng mananaya na makapag-uuwi ng P202.5 million para sa 6/55 Grand Lotto at P41 million naman ang naghihintay sa mananalo para sa 6/45 Mega Lotto.
Samantala, handa na ang mas pinalawak at mas accessible na lotto draw ng PCSO na mapapanood na sa Intercontinental Broadcasting Corporation (IBC-13) at Digital 8 TV simula sa Disyembre 31, 2024.
Ang kolaborasyon ng PCSO, IBC-13 at D8TV ay naglalayong magbigay ng mas mataas na kalidad ng broadcast gamit ang digital technology kung kaya’t hindi na lamang sa analog TV mapapanuod ang live na lotto draws kundi pati na rin sa digital platforms.
Sa pamamagitan din nito ay mas marami ng mga Pilipino ang makasusubaybay sa kani-kanilang paborito at tinatayaang numero anumang oras gustuhin dahil magiging available ito sa Facebook pages at YouTube channels ng PCSO, IBC-13, IBC’s radio DWAN 1206 AM at D8TV.
Samantala, bukod sa lotto draw ay patuloy na pinalalawak ng IBC-13 ang pagkakaroon ng makabagong content, kabilang ang mga bagong TV shows na ilulunsad sa darating na 2025. – AL
