Ikinalungkot ni Presidential Communications Office (PCO) Secretary Jay Ruiz ang nagaganap na online division o pagkakahati ng sambayanang Pilipino dahil sa talamak na disinformation, misinformation at fake news sa social media platforms.
Sa kanyang pagdalo sa pagdinig ng House Tri-Committee kaugnay sa isyu ng fake news ngayong Biyernes, Marso 21, binigyang-diin ni Ruiz na pinagsasabong lang ng fake news ang mga tao.
“What is happening to us right now is we are being polarized, being divided online. Filipinos are being pitted against Filipinos,” saad ni Ruiz.
Ayon sa kalihim, ang isang malaking laban na dapat gawin ng bansa ay i-neutralize ang mga malisyosong balita at impormasyon na nababasa online.
“Lies, repeated a thousand times, becomes the truth. We have to fight lies with truth. The voice of truth should be louder than lies,” pagbibigay-diin niya.
Iminungkahi ni Ruiz ang mahigpit na pagtutulungan ng PCO, Department of Justice (DOJ), at Department of Information and Communications Technology (DICT) sa pagsugpo sa fake news.
Una nang nagbabala si Sec. Ruiz sa panganib ng paghahati ng populasyon dulot ng mga maling impormasyon. – VC
