Magsisimula sa P90-milyon ang halaga ng minimum jackpot prizes ng Philippine Charity Sweepstakes Office (PCSO) sa kanilang lotto games simula ngayong araw, Oktubre 29 hanggang bukas, Oktubre 30.
Ito ang “Anniversa-Regalo” ng PCSO para sa pagdiriwang ng kanilang ika-90 anibersaryo.
Kaya naman ang minimum jackpot prize para sa Lotto 6/42, SuperLotto 6/49, UltraLotto 6/58, MegaLotto 6/45 at GrandLotto 6/55 ay ‘guaranteed’ na magsisimula sa P90-M.
“We are thrilled to celebrate our 90th anniversary and express our gratitude to the players who have supported us through the years. This special promotion embodies our commitment to providing not just entertainment but also hope and assistance to our communities,” mensahe ni PCSO General Manager Melquiades Robles.
Para sa mga laro kung saan ang kasalukuyang jackpot ay lumampas sa P90 milyon sa mga itinatakdang petsa ng draw, hindi na ito magbabago at kung ang jackpot ay mas mababa sa P90 milyon, ito ay kukunin sa PCSO prize fund.
Hinimok naman ng PCSO ang mga Pilipino na makibahagi at huwag palampasin ang tiyansa na manalo. – VC
