Muling iginiit ni Pangulong Ferdinand R. Marcos Jr. na ang pag-aresto kay dating Pangulong Rodrigo Duterte ay pagsunod at bahagi ng obligasyon ng Pilipinas sa International Criminal Police Organization (Interpol).
“Interpol asked for help, and we obliged because we have commitments to the Interpol which we have to fulfill. If we don’t do that, they will not – they will no longer help us with other cases involving Filipino fugitives abroad,” paliwanag ng Pangulo.
“This is what the international community expects of us as the leader of a democratic country that is part of the community of nations,” dagdag pa niya.
Nitong Marso 11 nang matanggap ng Interpol Manila ang opisyal na kopya ng arrest warrant ng International Criminal Court (ICC) laban sa dating Pangulo kaugnay sa umano’y ‘crime against humanity’ ng kampanya kontra droga ng kanyang administrasyon noon.
Bandang 9:20 a.m. nang naisilbi ito ng Prosecutor General ng Department of Justice (DOJ) kay Duterte nang lumapag ang Cathay Pacific flight No. CX 907 mula Hongkong sa Villamor Air Base sa Pasay City kung saan lulan siya at kanyang asawa.
Sa ngayon ay nakaalis na patungong The Hague, Netherlands si dating Pangulong Duterte para harapin ang mga kasong kriminal kaugnay sa umano’y madugong war on drugs na ipinatupad nito sa ilalim ng kanyang administrasyon. – AL
