Mahigpit na ipinag-utos ni Pangulong Ferdinand R. Marcos Jr. sa mga kinauukulang ahensya ng pamahalaan ang agarang pagkilos upang matiyak ang ligtas, maayos, at maagap na repatriation ng mga Pilipinong nasa Israel at Iran bunsod ng naganap na tensyon sa Middle East.
“I have directed all concerned government agencies to take the necessary steps to ensure the safe, timely, and orderly return of Filipinos who wish to avail of the voluntary repatriation program,” wika ng Pangulo sa isang video message nitong Lunes, Hunyo 23.
Ayon sa Pangulo, umabot na sa 223 ang repatriation requests mula Israel na kasalukuyang pinoproseso.
Nakatakda namang dumating ang unang batch ng 26 Pinoy na sumailalim sa voluntary repatriation program mamayang gabi kasama si DMW Secretary Hans Cacdac.
Kasunod ito ng itinaas na Alert Level 3 status ng Department of Foreign Affairs (DFA) sa rehiyon.
“In Israel… we are processing over 200 requests for repatriation — and we are moving quickly to bring them home, while others have opted to remain at work,” ani Pangulo.
Nagkaloob na ang pamahalaan ng food packs at financial assistance para sa mga overseas Filipino workers (OFWs) na pansamantalang nanunuluyan sa Migrant Workers Office hostel.
Kaugnay nito, tiniyak din ng Pangulo ang patuloy na pagbabantay sa kalagayan ng isang OFW caregiver na kasalukuyang naka-oxygen support at ventilator sa isang ospital sa Israel.
Samantala, inihahanda na ng Embahada ng Pilipinas sa Iran ang repatriation ng walong Pilipino sa mga susunod na araw.
Pinatitiyak din ng Pangulo ang pagbibigay ng P150,000 halaga ng tulong pinansyal sa mga repatriates, kasama ang libreng accommodation, transportasyon, at mga livelihood training vouchers para makapagsimula muli.
“I urge our fellow Filipinos to coordinate with our embassies in Tel Aviv and Tehran. Please follow their guidance, inform them of your situation, and do not hesitate to ask for assistance,” panawagan ni PBBM.
“Your government continues to act and is ready to serve to protect your safety and well-being. Nothing is more important than the safety of every Filipino,” pagtatapos niya. – VC
