Ipinag-utos ni Pangulong Ferdinand R. Marcos Jr. sa Department of Public Works and Highways (DPWH) ang pagpapatupad sa na-update na Bicol River Basin Master Plan upang matugunan ang patuloy na pagbaha sa Bicol Region.
Sa isinagawang Regional Development Council meeting sa Pili, Camarines Sur nitong Biyernes, Marso 7, binigyang-diin ng lider na hindi na angkop ang lumang master plan sa pagtugon sa lumalalang lagay ng panahon.
“I already instructed the Public Works to come up with a master plan which is appropriate for now. There is no other way to address the flooding problem except to manage the water flowing into the Bicol Region River Basin,” ani Pangulo.
“At least we have a plan now. We have to implement it properly because the old master plan was not rigorously implemented so we have the same problem,” dagdag pa niya.
Binanggit din ni Pangulong Marcos Jr. na kailangang maibigay sa lahat ng stakeholder ang updated na Bicol River Basin Master Plan upang maunawaan kung paano ito gagana, partikular na sa mga pambansa at mga lokal na pamahalaan na dapat magpatupad nito.
Matatandaan na ipinag-utos ng Pangulo ang pagsasaayos sa nasabing master plan noong Nobyembre 2024 nang bumisita sa Camarines Sur.
