NBI released Sarah Discaya’s mug shot after being arrested (Photo from NBI);
while former DPWH 1st District Engineer Henry Alcantara returned P71 million as part of restitution.
Sinilbihan na ng National Bureau of Investigation (NBI) ng arrest warrant mula sa Cebu court ang government contractor na si Cezarah Rowena “Sarah” Discaya.
Kasama ang NBI, dinala si Discaya sa Cebu kung nasaan ang Regional Trial Court, Seventh Judicial Region, Branch 27 na naghain ng arrest warrants laban sa kanya.
Bago ito, humarap din ngayong araw si Discaya sa Department of Justice (DOJ) para sa preliminary investigation hearing kaugnay ng tax evasion charges laban sa kanya.
Kaugnay ito ng iba’t ibang kaso kabilang ang violation of Section 3 (e) of Republic Act No. 3019 o Anti-Graft and Corrupt Practices Act at “malversation of public funds or property through falsification of public documents” sa ilalim ng Article 217.
“The NBI underscores that all actions taken are in strict observance of due process and the rule of law. Further updates will be released through official channels as warranted,” pahayag ng NBI.
Samantala, ipinakita ni Independent Commission for Infrastructure (ICI) chair Andres Reyes Jr. at Department of Justice (DOJ) acting Secretary Fredderick Vida ang karagdagang P71 milyon na ibinalik ni dating Department of Public Works and Highways (DPWH) Bulacan 1st District Engineer Henry Alcantara bilang parte ng restitusyon.
Kasunod ito ng ibinalik niyang P110 milyon na ill-gotten wealth mula sa mga ghost flood control projects.
Ayon kay Vida, ang restitusyon ay nagpapakita ng pananagutan ni Alcantara at kooperasyon nito sa mga prosecutor.
Kinumpirma naman ni Prosecutor General Richard Fadullon na kwalipikado na bilang state witness si Alcantara.
