Inaasahang ipatutupad na sa unang bahagi ng 2026 ang micro loan program ng Social Security System (SSS) alinsunod sa inaprubahang guidelines ng Social Security Commission noong Miyerkules, Disyembre 17.
Layunin ng programa na magbigay ng ligtas at abot-kayang paraan para makahiram ng pera ang mga miyembro nito para sa short-term needs, ayon kay SSS Officer-in-Charge Robert Joseph M. De Claro.
Ang loan program ay may 15 hanggang 90 araw na tenor at may interest rate na 8% kada taon, o katumbas ng 0.67% kada buwan. Ito ay ipatutupad sa pamamagitan ng mga partner institutions mula sa pakikiisa ni Finance Secretary Frederick D. Go.
Maliban sa micro loan program, isusulong din ng SSS ang iba pang mga proyekto para sa 2026.
Kabilang dito ang pakikipagtulungan sa National Commission of Senior Citizens (NCSC) sa ilalim ni Chairperson Ma. Merceditas N. Gutierrez para sa Annual Confirmation of Pensioners (ACOP) Program, mga espesyal na programa para sa mga gig economy workers, at isang contribution subsidy program para sa 2,000 OFWs, sa pakikipagtulungan ng Double Dragon Corporation.
“Looking back at 2025 and forward to 2026, we remain committed to our goal of making SSS relevant in the life of every Filipino at every point in their lives by providing quality social protection, continuous enhancement of member servicing platforms, and espousing the value of saving for the future,” pahayag ni De Claro. – VC
