Iniulat sa 6th Legislative-Executive Development Advisory Council (LEDAC) meeting ngayong Miyerkules, Setyembre 25, na pinangunahan ni Pangulong Ferdinand Marcos Jr., na 19 sa 64 LEDAC priority bills ng administrasyon ang naisabatas na.
Sa isang press briefing sa Malacanang, sinabi ni Senate President Chiz Escudero na may lima pang priority measures na inaasahang maipasa ang Senado bago matapos ang 2024 at karagdagang tatlo hanggang lima pa na nakalinya bago matapos ang 19th Congress.
“We expect an additional five of these bills to be finished and enacted on the part of the Senate and the House before the year ends and before we go on our Christmas break. When we resume, we expect to be able to pass on the part of the Senate about 3 to 5 more of these measures, totalling therefore, an additional 13 before we go on formal break and end the 19th Congress,” paliwanag ng Senate President.
Ayon kay Escudero, ang natitirang limang LEDAC bills ng Senado ay ang pag-amyenda sa Universal Health Care (UHC) law, Electric Power Industry Reform Act (EPIRA) law, Foreign Investor Long Term Lease, Agrarian law at ang New Department Water Bill.
Sa kampo naman ng Kamara, tanging ang Foreign Investor Long Term Lease at Agrarian law amendments na lamang ang hawak na priority measures.
Samantala, ‘top priority’ ng pamahalaan ang agarang pagpasa sa General Appropriations Bill para sa taong 2025, kasunod na rin ng natanggap na certification of urgency mula sa Malacañang.
“Yesterday, we received communication from His Excellency certifying to the urgency of the passage of the 2025 GAB. The House of Representatives commits to approve the FY 2025 General Appropriations Bill on second and third reading by today’s session, before we adjourn for the October recess,” pahayag ni House Speaker Martin Romualdez.
Umaasa rin ang Kamara na maaprubahan ang pondo bago matapos ang Disyembre 2024 o bago ang Pasko.
“Yon talaga ang hangarin natin para mayroong maligayang pasko, hindi lang para sa administrasyon pero sa taumbayan na isang national budget for progress prosperity and development para sa buong sambayanang Pilipinas,” dagdag ng House Speaker. — VC
