Patuloy na magdadala ng mga pag-ulan sa malaking bahagi ng bansa ang tatlong weather systems ngayong Linggo, Disyembre 29, ayon sa Philippine Atmospheric, Geophysical and Astronomical Services Administration (PAGASA).
Kabilang na rito ang Northeast Monsoon o Amihan na magdudulot ng maulap na papawirin na may kasamang mahihinang pag-ulan sa Northern Luzon, partikular sa Cagayan Valley Region at bahagi ng Cordillera Administrative Region (CAR).
Asahan din ang maulap na kalangitan at ilang malalakas na pag-ulan sa CALABARZON, Aurora, ilang bahagi ng Bicol Region, kasama na ang Metro Manila dahil pa rin sa Shearline o banggaan ng malamig at mainit na hangin.
Samantala, nakakaapekto naman ang Intertropical Convergence Zone (ITCZ) sa Palawan, silangang bahagi ng Visayas at malaking bahagi ng Mindanao.
Pinag-iingat ang mga apektadong lugar sa posibleng banta ng pagbaha at pagguho ng lupa.
As of 4:00 a.m., walang namamataang low pressure area (LPA) o bagyo sa loob at labas ng Philippine Area of Responsibility (PAR).
Gayunpaman, patuloy hinihikayat ang publiko na maging handa sa anumang pagbabago sa lagay ng panahon.
