Pangungunahan ng Department of Social Welfare and Development (DSWD) ang pagsasagawa ng high-level forum na magtitipon sa mga miyembrong bansa ng Association of Southeast Asian Nations (ASEAN) at iba’t ibang sektor, upang talakayin ang mga makabago at sustainable na paraan para sa pagtugon sa lumalaking populasyon ng mga matatanda sa rehiyon.
Magiging katuwang ng DSWD sa “ASEAN High-Level Forum on Unlocking the Silver Economy” forum ang United Nations Population Fund (UNFPA), United Nations Economic and Social Commission for Asia and the Pacific (UNESCAP), at Economic Research Institute for ASEAN and East Asia (ERIA).
Gaganapin ito sa Philippine International Convention Center (PICC) sa Pasay City mula Hunyo 3-4.
Sa forum, isusulong ang mga polisiya at klase ng pamumuhunan na magbibigay ng kapangyarihan sa sektor ng senior citizens sa Southeast Asia habang magpapalakas sa kanilang ambag sa paglago ng-ekonomiya, sa kabila ng kanilang edad.
Tatalakayin din dito ang mga usapin kaugnay ng kalusugan, integrated care systems, social protection, lifelong learning, entrepreneurship, at inobasyon para sa kanilang populasyon.
Ayon kay DSWD spokesperson at Assistant Secretary Irene Dumlao, mahalagang kilalanin ang potensyal ng mga senior citizen bilang aktibong kalahok sa pag-unlad ng lipunan at ekonomiya.
“Our focus on the silver economy is not only about responding to the needs of older persons. It is also about recognizing their continued capacity to contribute to communities and economies when the proper support systems are in place,” ani Dumlao.
Inaasahang tatalakayin din ng mga ASEAN representatives ang pagsusulong ng mga makabagong teknolohiya at serbisyo para sa senior citizens, pagpapalakas ng mga programang pangkalusugan at social protection, at pagpapahusay ng kooperasyon at pamumuhunan ng mga bansa sa ASEAN para sa pagpapaunlad ng silver economy.
Nakaayon ang inisyatibang ito sa temang isinusulong ng DSWD
Sa ilalim ng ASEAN Socio-Cultural Community (ASCC), isinusulong ng DSWD ang temang “RISE ASEAN” sa chairship ng Pilipinas, na nangangahulugang “Resilient and Empowered Families, Inclusive Development, Smart Youth and Innovation, at Environmentally Sustainable and Food-Secure Future.” – VC
