Matapos ang mapayapang pagsalubong ng Bagong Taon, nakatuon na ngayon ang National Capital Region Police Office (NCRPO) sa paghahanda para sa selebrasyon ng Pista ng Poong Itim na Nazareno sa Enero 9.
Naglatag na ng mga tauhan upang matiyak ang kaligtasan ng mga deboto, dahil inaasahang dadagsa ang milyong tao para sa mahalagang kaganapan.
Iniulat ng NCRPO na may kabuuang 12,168 na pulis ang naka-deploy sa iba’t ibang lugar sa Maynila at madaragdagan pa ng 2,306 tauhan mula sa iba pang ahensya ng gobyerno, o katumbas ng 14,474 buong pwersa ng kapulisan.
Pinatutunayan ng maagang deployment plan ang pangako ng NCRPO na mapanatili ang ligtas at maayos na seguridad sa mga malalaking aktibidad sa Kalakhang Maynila.
Pagtitiyak ni NCRPO Director Brig. Gen. Anthony Aberin, ang kanilang estratehiya ay nakatuon sa pagpapalakas ng police visibility at pagtutok sa mga lugar kung saan maraming tao.
Inaasahan ng NCRPO na magiging maayos ang selebrasyon, katulad ng naging sitwasyon noong nakaraang taon kung saan umabot sa mahigit 6.5 milyong deboto ang sumama sa Traslación. – VC
