Nanindigan si House Majority Leader Sandro Marcos na nananatiling nakatutok ang House of Representatives sa kanilang mga trabaho sa gitna man ng iba’t ibang usapin na kinahaharap ng bansa.
Sa katunayan, 12 mula sa 48 priority measures ng Legislative Executive Development Advisory Council (LEDAC) ang nagawang maaprubahan sa Kamara sa ikatlo at huling pagbasa, dagdag pa ang mahigit 7,000 mga panukala na naiproseo sa loob lamang ng 22 session days.
Kabilang dito ang pag-amyenda sa Government Assistance to Students and Teachers in Private Education Act; pag-amyenda sa Bank Deposits Secrecy Law, extension ng Estate Tax Amnesty period; at pagsasabatas sa Assistance to Individuals in Crisis Situations o AICS.
Binigyang-diin din ni Ilocos Norte 1st District Rep. Marcos ang pagsisikap nila ni House Speaker Faustino ‘Bojie’ Dy III na maging sentro ng kanilang unang buong regular session ang pagpasa ng mga makabuluhang batas na mapakikinabangan ng taumbayan.
Tiniyak naman ni House Assistant Majority Leader Zia Alonto Adiong na nagkakaisa ang liderato ng Kamara pagdating sa kung ano ang prayoridad.
“I do commend the action of the majority leader. These are priority agendas. It is our priority legislation, and we need to make sure that all identified priorities reach its final stage which is essentially the approval on third reading,” ani Adiong.
Sa pagbabalik-sesyon naman ng Kongreso sa Enero 26, target nilang unahing talakayin ang mga prayoridad na panukalang batas para sa social protection, kalusugan, edukasyon at good governance.
Kabilang na ang pinapauna ni Pangulong Ferdinand R. Marcos Jr. na Anti-political Dynasty Bill at Partylist Reform Act. (Ulat mula kay Earl Tobias)
