Makabibili na ang mas maraming Pilipino ng P40 kada kilo ng well-milled rice matapos magdagdag ang Department of Agriculture (DA) ng Kadiwa ng Pangulo rice kiosk sa apat (4) pang pampublikong palengke sa Metro Manila sa ilalim ng Rice-for-All program.
Ayon sa DA, nagsimula nang magbenta ng murang bigas sa apat na palengke nitong Sabado, Disyembre 21, kabilang ang:
– Larangay Public Market, Dagat Dagatan, Caloocan City
– Phase 9 Bagong Silang Market, Caloocan City
– Cloverleaf Market, Balintawak, Quezon City
– New Marulas Public Market, Valenzuela City
Bukas ang mga bagong rice kiosk mula 4:00 a.m. hanggang 6:00 p.m. buong holiday season kung saan magsasara lamang ito sa Disyembre 24-25 at Disyembre 30-Enero 1, 2025.
“The DA is actively coordinating with market leaders to further expand the Rice-For-All Program, with plans to establish more KADIWA ng Pangulo kiosks across Luzon and eventually nationwide,” saad ni DA Assistant Secretary for Kadiwa program Genevieve Velicaria-Guevarra.
Kasabay nito, binuksan din ang rice kiosk para naman sa P29 rice program sa Kamuning Market sa Quezon City, Pasay City Public Market, at New Las Pinas City Market.
Binigyang-diin ni DA Secretary Francisco Tiu Laurel na mahalaga ang nasabing inisyatiba alinsunod sa pangako ng pamahalaan na gawing abot-kaya ang bigas sa mga pamilyang Pilipino.
