Nakatakdang ilunsad ng Department of Social Welfare and Development (DSWD) ang “Tara, Usap!” Program sa Huwebes, Agosto 13, para tugunan ang isyu sa mental health na nakakaapekto sa mga Pilipino, partikular na sa mga kabataan.
Pilot site ng programa ang Pamantasan ng Lungsod ng Valenzuela bilang pangunahing target ang mga kabataang benepisyaryo na magsisilbing tutors at youth development workers (YDWs) sa ilalim ng Tara, Usap!
Ang programa ay isang school and community-based Mental Health and Psychosocial Support (MHPSS) na naglalayong palakasin ang kabuuang kapakanan ng youth beneficiaries sa pamamagitan ng mental health promotion, psychosocial support, peer support sa Tara, Basa! Framework.
Hinihimok ang mga benepisyaryo na magpasa ng aplikasyon bilang Peer Facilitators, kung saan ang mga kwalipikadong aplikante ay sasailalim sa capability-training para pangunahan ang ‘structured support sessions’ na tatawaging “Tara, Kausap Circles.”
“Nais ng DSWD na magkaroon ng mental health awareness, at matuto ang ating mga kabataan ng psychological first aid (PFA), stress management, at maging katuwang ng pamahalaan sa pag-promote ng help-seeking behaviors dahil maraming Pilipino ang hindi alam kung paano tutugunan ang kani-kanilang mga mental health issues,” ayon kay DSWD Spokesperson Irene Dumlao.
Sa gabay ng specialized Peer Facilitator Handbook, ang bawat circle ay magkakaroon ng tatlo hanggang limang kalahok na magsasagawa ng walong structured sessions.
Sisimulan ang capability-building activities para sa kabataang Peer Facilitators bago matapos ang Agosto, habang ang Tara, Kausap Circles sessions naman ay itatakda mula Oktubre hanggang Nobyembre 2026. -VC
