Nagpahayag si Pangulong Ferdinand R. Marcos Jr. ng matibay na suporta para sa pagpapatuloy ng konstruksyon ng Virology and Vaccine Institute of the Philippines (VIP) na mahalaga para sa paghahanda ng bansa sa posibleng pandaigdigang pandemya sa hinaharap.
Sa isang pagpupulong sa Malacanang, hiniling ng Department of Science and Technology (DOST) ang kinakailangang pondo upang maiwasan ang pagkaantala at pagkasira ng VIP Administration Building.
“I think in the immediate future, okay. We prepare for the big one, the big pandemic,” ani Pangulong Marcos Jr. sa kanyang pakikipag-usap kay DOST Secretary Renato Solidum Jr.
Nabanggit naman ni Solidum na walang nakalaang pondo para sa VIP sa 2025 national expenditure program ng Department of Public Works and Highways (DPWH).
Bilang tugon, tiniyak ng Pangulo na hahanap ang gobyerno ng paraan upang makakuha ng sapat na pondo at maiwasan ang pagkaantala ng mahalagang proyekto.
“We find money for this when we are able to identify the specific items as you know not ready for implementation,” saad ni Pangulong Marcos Jr.
Tinatayang P680 milyon ang kinakailangan para sa mga plano ng DOST sa VIP, kabilang ang paglikha ng mga bakuna para sa tao, hayop, at halaman.
“There are more balikbayan scientists [now] na gusto tumulong sa atin. We just need this facility,” ani Solidum.
Inaasahang magiging pundasyon ang VIP para sa pananaliksik at inobasyon kaugnay sa mga virus na nakakaapekto sa tao, hayop, at halaman. – VC
