Nais ni Pangulong Ferdinand R. Marcos Jr. na bigyang-prayoridad ng pamahalaan at iba pang stakeholders ang pagpapaunlad ng semiconductor at electronics industry na nakikitang may magandang benepisyo sa ekonomiya ng Pilipinas.
Ito ang naging sentro ng pulong ni Pangulong Marcos Jr. kasama ang Private Sector Advisory Council-Education and Jobs Sector Group (PSAC-EJSG) nitong Martes, Enero 21.
“Actually, we really need to push on the semiconductor industry. It’s because, again, it’s not something that we had in mind but the situation — considering how much money we make as the income we get from exports already,” saad ng Pangulo.
Binigyang-diin ng Pangulo na isa sa dapat pagtuunan ng pansin ang pagbibigay ng mga insentibo sa semiconductor locators gaya ng ginagawa sa iba pang industriya.
Ginawa nitong halimbawa ang pagbibigay ng incentives sa car manufacturing industry alinsunod sa tuntunin ng CREATE MORE Act na wala aniya para sa semiconductor.
Iminungkahi ni Pangulong Marcos Jr. na maaari itong gawin sa pamamagitan ng
Implementing Rules and Regulations (IRR).
“We’ll do it through the IRR siguro. Kasi it took us such a while to get the CREATE MORE in the first place. Kaya naman siguro kasi it’s just another incentive scheme,” ani Pangulo.
Kasabay nito ay inilatag din ng PSAC-EJSG sa Pangulo ang semiconductor at electronics roadmap kung saan inirekumenda nito ang paglikha ng National Education and Workforce Development Plan (NatPlan).
