Malugod na tinanggap ni Pangulong Ferdinand R. Marcos Jr. ang paglagda sa 10 kasunduan sa pagitan ng Pilipinas at Republic of Korea (ROK) sa isinagawang state visit ni South Korean President Lee Jae Myung nitong Martes, Marso 3, na layong palalimin ang kooperasyon ng dalawang bansa sa mahahalagang sektor.
Sa joint press conference, sinabi ng Pangulo na ang mga pinirmahang Memoranda of Understanding (MOU) ay sumasaklaw sa defense materials procurement, veterans affairs, agrikultura, kalakalan, pamumuhunan, intellectual property, digital cooperation, digitalization at innovation, pagsasanay sa wikang Korean sa mga paaralan, cultural cooperation, at police cooperation.
Ayon sa Pangulo, magpapatibay ang mga kasunduang ito sa Philippines-ROK strategic partnership na itinaas noong 2024, na naglalayong higit pang palalimin ang kooperasyon ng dalawang bansa sa mga larangang may kapwa interes at prayoridad.
Kabilang sa mga nilagdaang MOU ang digital cooperation sa pagitan ng Department of Information and Communication Technology (DICT) ng Pilipinas at Ministry of Science and ICT ng ROK, pati na ang kasunduan sa technology, digitalization, at innovation program sa pagitan ng Department of Economy, Planning, and Development (DEPDev) at Ministry of Foreign Affairs ng ROK.
Nilagdaan din ang Amendment Number 2 sa Implementing Arrangement (IA) sa pagitan ng Department of National Defense (DND) at Defense Acquisition Program Administration ng ROK hinggil sa procurement ng ilang defense materials, pati ang MOU sa cooperation ng Field of Patriots and Veterans Affairs.
Sa sektor ng agrikultura at kalakalan, nilagdaan din ang kasunduan sa pagitan ng Department of Agriculture (DA) at Ministry of Agriculture, Food, and Rural Affairs ng ROK, habang pinagtibay din ang MOU sa trade, investment, economic cooperation, at intellectual property sa pagitan ng Department of Trade and Industry (DTI) at Ministry of Trade, Industry, and Resources at Ministry of Intellectual Property ng ROK.
Samantala, sinelyuhan din ng dalawang bansa ang MOU sa Special Program in Foreign Language para sa pagtuturo ng wikang Korean sa mga paaralan sa ilalim ng Department of Education (DepEd) at Ministry of Education ng ROK.
Lumagda naman ng cultural cooperation ang National Commission for Culture and the Arts (NCCA) at Ministry of Culture, Sports, and Tourism ng ROK, pati ang police cooperation sa pagitan ng Philippine National Police (PNP) at Korean National Police Agency. – VC
