Opisyal nang inilunsad ng Department of Information and Communications Technology (DICT) ang eGov AI, isang bagong artificial intelligence (AI)-powered feature ng eGovPH Superapp ngayong araw, Setyembre 21.
Ito ay bahagi ng pagsusulong ni Pangulong Ferdinand R. Marcos Jr. para sa mas malawak na paggamit ng AI upang mapabilis at mapadali ang pag-access ng mga Pilipino sa serbisyo ng pamahalaan.
Sa mensaheng binasa ni Cabinet Secretary Benhur Abalos, sinabi ng Pangulo na dapat gawing mas accessible sa publiko ang mga makabagong teknolohiya tulad ng AI at samantalahin upang mapabuti ang paghahatid ng serbisyo ng gobyerno.
Kabilang sa eGov AI ang built-in AI assistant na “Kuya A,” na magbibigay ng real-time guidelines sa mga user sa paggamit ng government services online.
Libre itong magagamit ng mga verified user ng eGovPH Superapp.
May kakayahan ang platform na magsagawa ng document extraction, image identification, translation, form understanding at speech generation.
Magbibigay ang eGov AI ng impormasyon tungkol sa turismo, batas, polisiya at government guidelines.
May electronic Know Your Customer (eKYC) feature ito para mapabilis ang identity verification, habang gumagamit ng liveness checks bilang karagdagang proteksyon laban sa fraud at hindi awtorisadong access.
May real-time translation feature naman upang makatulong na mabawasan ang language barriers sa paggamit ng digital government services.
Sa kanyang mensahe, hinimok ng Pangulo ang publiko na gamitin ang AI nang “wisely, responsibly, and ethically,” at iginiit na dapat nitong suportahan sa halip na palitan ang desisyon ng tao.
“Always remember that technology should sharpen our judgment, not replace it. Let us use AI as a tool to make well-informed decisions without surrendering our own capacity to question, discern, and decide,” ani Pangulo. – VC
