Nakipagpulong si Pangulong Ferdinand R. Marcos Jr. sa mga opisyal ng Amazon Web Services (AWS) Inc. nitong Miyerkules, Hulyo 8, upang talakayin ang planong $5 bilyong pamumuhunan sa Pilipinas sa loob ng susunod na 15 taon.
Sa isinagawang courtesy call sa Malacañang, tinalakay ng mga opisyal ng AWS ang pagpapalawak ng kanilang operasyon sa bansa na bahagi ng layunin ng administrasyon na pabilisin ang digital transformation at maitatag ang Pilipinas bilang isang regional hub para sa digital infrastructure.
Ayon sa Presidential Communications Office (PCO), kabilang sa iminungkahi ng mga opisyal ang posibleng pagtatayo ng AWS Region, isang pangkat ng mga data center na magbibigay ng cloud computing services nang direkta mula sa Pilipinas.
Sa oras na maisakatuparan, inaasahang mapapalakas ang digital infrastructure ng bansa, makalilikha ng libu-libong mataas na kalidad na mga trabaho, at makapagbibigay ng mga negosyo at startup.
Magbibigay din ito ng mas mabilis, mas ligtas, at mas maaasahang cloud services sa mga ahensya ng pamahalaan habang pinapahusay ang digital competitiveness ng Pilipinas sa pamamagitan ng pagpapalawak ng access sa mga cloud technology na mahalaga sa artificial intelligence, data analytics, cybersecurity, e-commerce, at digital government services. – VC
