Magpapatupad ng Libreng Sakay ang Department of Transportation – Metro Rail Transit Line 3 (DOTr-MRT-3) sa lahat ng National ID holder tuwing araw ng Miyerkules sa buong buwan ng Agosto ngayong taon, bilang pakikiisa sa paggunita ng paglagda sa Republic Act No. 11055 o ang Philippine Identification System Act.
Aarangkada ang libreng sakay sa Agosto 5, 12, 19, at 26 sa mga sumusunod na oras:
- 7:00 a.m. hanggang 9:00 a.m.
- 5:00 p.m. hanggang 7:00 p.m.
Maghahandog din ng libreng train fare ang MRT-3 sa Setyembre 16, bilang pagdiriwang naman sa Global Identity Day.
Kinakailangan lamang ipakita ang National ID, mapa-physical ID, Digital ID, o ePhilID man na naka-paper format para ma-avail ang serbisyo.
Kaisa ng DOTr-MRT-3 ang Philippine Statistics Authority sa paghahatid ng libreng sakay kung saan magkakaroon din ng National ID registration ang PSA sa ilang istasyon ng transit line, partikular na sa Araneta-Cubao at Taft Avenue Stations.
Pangako ng pamunuan ng MRT-3 na magpapatuloy ang kanilang pakikipagtulungan sa iba’t ibang ahensya ng pamahalaan tungo sa mas maayos at epektibong serbisyo para sa mga Pilipino, lalo na sa mga komyuter.
