Hinimok ni Pangulong Ferdinand R. Marcos Jr. ang military personnel ng Philippine Air Force (PAF) na manatiling tapat sa kanilang sinumpaang tungkulin na mandato ng Konstitusyon, kasabay ng pagpapanatili ng propesyunalismo, displina, at integridad sa gitna ng hamon sa seguridad na kinahaharap ng bansa.
Sa kanyang talumpati sa 79th PAF Founding Anniversary sa Villamor Air Base sa Pasay City ngayong Hulyo 1, binigyang-diin ng Pangulo ang mahalagang gampanin ng militar sa pagtatanggol sa demokratikong institusyon ng Pilipinas bukod sa pambansang seguridad.
“As your Commander-in-Chief, I encourage you to continue upholding the highest standards of professionalism, discipline, and integrity. Above all, remain faithful to your constitutional duty to protect our people and defend the democratic institutions that safeguard our freedoms,” panawagan ng Pangulo.
Kinilala naman ni Pangulong Marcos Jr. ang pag-unlad ng pwersa sa nakalipas na halos walong dekada bilang pangunahing institusyon ng bansa pagdating sa depensa sa teritoryo, pambansang seguridad, at humanitarian response, mula ng maging hiwalay na pangunahing sangay ito ng Armed Forces of the Philippines (AFP) noong 1947.
Kabilang din sa pinuri ng Pangulo ang hakbangin ng PAF na palakasin ang territorial defense posture ng Pilipinas sa pamamagitan ng regular na pagpapatrolya at air surveillance operations.
“At the same time, you have reinforced our territorial defense through sustained patrols and air surveillance operations, strengthening our maritime domain awareness and sovereignty protection,” ani Pangulong Marcos Jr.
Samantala, para tugunan ang lumalagong banta sa seguridad, pinagtibay ng Pangulo ang pangako ng pamahalaan na pabilisin ang modernization efforts sa tulong ng PAF Modernization Program.
Ayon kay Pangulong Marcos Jr., patuloy ang administrasyon sa pagpapalakas ng kanilang operational capabilities sa pamamagitan ng pagbili ng mga helicopter, aircraft at surveillance radar systems, specialized intelligence training, advanced flight simulation programs, at joint exercises kasama ang local at international military counterparts.
“Be assured that the Administration is committed to providing the Philippine Air Force with the resources, opportunities, and support necessary to carry out your mission with honor and excellence,” pagtitiyak ng Pangulo.
Kabilang din sa susuportahan ng pamahalaan ang mga programa para sa mental health at kabuuang kapakanan ng bawat Airman at Airwoman ng pwersa.
“Together, let us stay the course and build a Bagong Pilipinas that is secure, resilient, and prepared for the challenges of tomorrow,” saad ng Pangulo. – VC
